52. अत् तूर - ٱلطُّور
अल्लाहच्या नावाने जो असीम दयावंत व परम कृपावंत आहे
- शपथ आहे ’तूर’ची
- आणि अशा एका उघड ग्रंथाची
- जो तलम कातडीवर लिहिला गेला आहे,
- आणि सदैव वावर असलेल्या गृहाची (काबागृहाची),
- आणि उंच छताची
- आणि उसळत्या समुद्राची,
- की तुझ्या पालनकर्त्याचा प्रकोप निश्चितपणे घडणार आहे,
- ज्याचे कोणी निवारण करू शकणार नाही.
- तो त्या दिवशी घडेल जेव्हा आकाश भयंकरपणे डगमगू लागेल
- आणि पर्वत उडत फिरतील.
- विनाश आहे त्या दिवशी त्या खोटे ठरविणार्‍यांसाठी
- जे आज खेळ म्हणून आपल्या वितंडवादात गुंतलेले आहेत.
- ज्या दिवशी त्यांना धक्के मारून मारून नरकाग्नीकडे चालते केले जाईल
- त्यावेळी त्यांना सांगण्यात येईल की, ’’हा तोच अग्नी आहे ज्याला तुम्ही खोटे ठरवीत होता.
- आता सांगा, ही जादू आहे अथवा तुम्हाला उमजत नाही?
- जा आता होरपळले जा याच्यात, मग तुम्ही सहन करा अथवा न करा, तुमच्यासाठी एकसारखे आहे, तुम्हाला तसाच बदला दिला जात आहे जसे तुम्ही आचरण करीत होता.’’
- ईशपरायण लोक तेथे उद्यानांत व ऐश्वर्यात असतील.
- आनंद लुटत असतील त्या वस्तूपासून ज्या त्यांचा पालनकर्ता त्यांना देईल. आणि त्यांचा पालनकर्ता त्यांना नरकाच्या प्रकोपापासून वाचवील.
- (त्यांना सांगितले जाईल) खा आणि प्या मजेत आपल्या त्या कृत्यांच्या मोबदल्यात जी तुम्ही करीत राहिला आहात.
- ते समोरासमोर मांडलेल्या आसनांवर तक्के लावून बसले असतील आणि आम्ही सुंदर डोळ्यांच्या अप्सरांशी त्यांचा विवाह करू.
- ज्या लोकांनी श्रद्धा ठेवली आहे, आणि त्यांच्या संततीनेदेखील एखाद्या श्रद्धा-श्रेणीत त्यांचे अनुकरण केले आहे, त्यांच्या त्या संततीलासुद्धा आम्ही (स्वर्गामध्ये) त्यांच्यात मिळवू आणि त्यांच्या कृत्यांत कोणतीही घट त्यांना होऊ देणार नाही. प्रत्येकजण आपल्या कमाईच्या मोबदल्यात गहाण आहे.
- आम्ही त्यांना हरतर्‍हेचे फळ आणि मांस, ज्या पदार्थाचीही त्यांना इच्छा होईल खूप देत राहू.
- ते एक दुसर्‍याकडून पेयपात्रे पुढे पुढे होऊन घेत असतील ज्यांत बकवास असणार नाही की दुराचार.
- आणि त्यांच्या सेवेत अशी मुले धावत फिरत असतील जी त्यांच्याच (सेवे) साठी खास असतील, असे सुंदर जणू लपवून ठेवलेले मोती.
- हे लोक आपापसांत एकमेकांशी (जगात ओढवलेल्या) प्रसंगांची हालहवाल विचारतील,
- हे म्हणतील की आम्ही पूर्वी आपल्या घरवाल्यांमध्ये भीत भीत जीवन व्यतीत करीत होतो,
- सरतेशेवटी अल्लाहने आमच्यावर मेहरबानी केली आणि आम्हाला होरपळून टाकणार्‍या वार्‍याच्या प्रकोपापासून वाचविले.
- आम्ही पूर्वीच्या जीवनात त्याचाच धावा करीत होतो. तो खरोखरच मोठा उपकारी व दयावान आहे.
- म्हणून हे पैगंबर (स.), तुम्ही उपदेश करीत रहा, आपल्या पालनकर्त्याच्या मेहरबानीने तुम्ही मांत्रिकही नाही आणि वेडेदेखील नाही.
- काय हे लोक म्हणतात की हा मनुष्य कवी आहे ज्याच्यासाठी आम्ही आपत्तीची वाट पहात आहोत?
- यांना सांगा बरे, प्रतीक्षा करा, मीसुद्धा तुमच्याबरोबर प्रतीक्षा करतो.
- काय त्यांची बुद्धी यांना अशाच गोष्टी करण्यास सांगते? अथवा वस्तुतः हे शत्रुत्वांत मर्यादेपलीकडे गेलेले लोक आहेत?
- काय हे म्हणतात की या माणसाने हा कुरआन स्वतःच रचला आहे? खरी गोष्ट अशी आहे की हे लोक श्रद्धा ठेवू इच्छित नाहीत.
- जर हे आपल्या या कथनात खरे असतील तर यांनी अशाच वैभवाची वाणी रचून आणावी.
- काय हे एखाद्या निर्मात्याविना स्वतःच जन्मले आहेत? अथवा हे खुद्द स्वतःचे निर्माते आहेत?
- अथवा पृथ्वी आणि आकाशांना यांनी निर्मिले आहे? खरी गोष्ट अशी आहे की हे विश्वास बाळगत नाहीत.
- काय तुझ्या पालनकर्त्याचे खजिने यांच्या ताब्यात आहेत? अथवा त्यांच्यावर यांचा हुकूम चालतो?
- काय यांच्याजवळ एखादी शिडी आहे जिच्यावर चढून हे लोक वरील जगताचा कानोसा घेतात? यांच्यापैकी ज्याने कानोसा घेतला असेल त्याने आणावे एखादे स्पष्ट प्रमाण.
- काय अल्लाहसाठी तर आहेत मुली आणि तुम्हा लोकांसाठी आहेत मुले?
- काय तुम्ही यांच्यापाशी काही मोबदला मागता? की हे जबरदस्तीने लादलेल्या भुर्दंडाच्या ओझ्याखाली दबले जात आहेत?
- काय यांच्यापाशी परोक्षाच्या हकीकतीचे ज्ञान आहे की त्याच्या आधारे हे लिहीत आहेत?
- काय हे एखादे कारस्थान करू इच्छितात? (जर अशी गोष्ट आहे) तर द्रोह करणार्‍यांवर त्यांचे कारस्थान उलटल्याशिवाय राहणार नाही.
- काय अल्लाहशिवाय यांचा एखादा अन्य उपास्य आहे? अल्लाह पवित्र आहे त्या अनेकेश्वरवादापासून जो हे लोक करीत आहेत.
- या लोकांनी आकाशाचे तुकडे कोसळताना जरी पाहिले तरी म्हणतील की हे ढग आहेत जे उसळून येत आहेत.
- म्हणून हे पैगंबर (स.), यांना यांच्या दशेत सोडा येथपावेतो की हे आपला तो दिवस गाठतील ज्यात हे हाणून पाडले जातील.
- ज्या दिवशी यांचा कोणताही डाव यांच्या कोणत्याही उपयोगी पडणार नाही की कुणी यांच्या मदतीलासुद्धा येणार नाही.
- आणि ती वेळ येण्यापूर्वीसुद्धा अत्याचार्‍यांसाठी एक प्रकोप आहे, परंतु यांच्यापैकी बहुतेकजण जाणत नाहीत.
- हे पैगंबर (स.), आपल्या पालनकर्त्याचा निर्णय येईपर्यंत धीर धरा, तुम्ही आमच्या नजरेत आहात. तुम्ही जेव्हा उठाल तेव्हा आपल्या पालनकर्त्याच्या स्तुतीबरोबर त्याचे पावित्र्यगान करा,
- रात्रीसुद्धा त्याचे पावित्र्यगान करीत जा आणि तारे ज्यावेळी परततात त्यावेळीसुद्धा.